اشعار ترکی و فارسی از دو شاعر خلخال

اِنصاف اِئلَه

شعرین قالیبی : غزل (بیت لَرین سایی : 12 بیت)

آی اؤ کَس که پؤز وئرورسَن عاشقَم اِنصاف اِئلَه

واژه ی پـاک و سَـلیم عشقه آز اِجحاف اِئلَه

قُـلّـه ی قـافـی مُسَلَّمدور اِئـدَر عنـقـا مکان

سَن بیر آز عنقایَه اؤخشا صؤنرا فکرِ قاف اِئلَه

عاشِق اؤلماق چؤخ چتیندور؛ساده سانما نازنین

قلبووی کین دَن ؛ کُدورتدَن اَوَلـدَه صاف اِئلَه

عاشق انسانلان سَنون چؤخدور عزیزیم فاصلون

بـو مُـقَـدَّس واژه ایـلَـن آز اؤزون علّاف اِئلَه

گئت اَوَل اؤرگن الف باسین بو عشقین صؤنرادان

فکرِ تفسیرِ حروف(عـین) و(شـین) و(قـاف) اِئلَه

شرح دَن؛ تفسیردَن ؛ تأویل دَن ؛ توصیف دَن

عِشْقْ مُسْتَغْنی دی ؛ آز مُسْتَلْزِمُ الْاَوْصافْ اِئلَه

ذهنووون پامبوقلاری پیرتلاشسا؛واردور چاره سی

چـالـمـاقـا پامبوق ؛ خَبَر حـلّاج یا نَدّاف اِئلَه

گَر کتابِ فکرون اؤز شیرازه سیندن آیریلیب

گئت یئنه صَحّافه یالوار؛خواهشِ صحّاف اِئلَه

حضرت مولا بویورموش:عاقیل انسانسان اگر

چؤخ فیکیرلش زندگانلیقدا ولـی آز لاف اِئلَه

گَل سنه بیر سؤز دئییم؛یاخشی سؤز اؤلسا ائت قبول

اؤلماسا یاخشی؛ قبول اِئتمَکدَن اِستنکاف ائلَه

غَرَّه اؤلما؛اؤلدی شیطان غَرَّه اؤلماقدان رَجیم

گِئت تلاوت اؤن بیریمجی آیه ی اَعراف اِئلَه

رَحمَتِ حَق ((جَعفَری)) نـوحـه یازان شاعِرلَرَه

یـادِ (قُمری) و (دَخیل) و (راجی) و (صَرّاف) اِئلَه

تهران ؛ قنات کوثر ؛ شنبه 11/8/1392 ؛ حیدرعلی جعفری زاویه