زبانحال لیلا((س))به حضرت علی اکبر((ع))در روز عاشورا قبل از عزیمت فرزند به میدان

یارداندا یارادان حُسنووی زیبا یارادوب

صورت و سیرَتوی جدّووَه همتا یارادوب

تک سنی خلق اِئلین اَشبَهِ طاها یارادوب

مثلووی غیر پیمبر سنون هاردا یارادوب؟

اوزونه مَظهَر ائدوب ربّیَّ الاَعلیا یارادوب

حَـمـد اؤلا حُسنوی ایـجـاد اِئلین یَزدانه

یوسفون حُسنون اِئدر حُسنِ رُخون اَفسانه

عاشقِ حُسنون اؤلارگؤرسَه؛تانیش؛بیگانه

ائدَرَم سجده سَنی خَلـق ائلیَن سُبـحـانه

سنی معشوق آنوی عاشق شیدا یارادوب

حَضرتِ ختمِ رُسُلدی سَنی کیم گؤرسه دِئیَر

دانیشان وقتیده گُفتـارون ائدَر قلبه اثر

واردی اِعجازِ کلامون سنون اِی نیک سِیَر

لبلرون سؤز دانیشان لحظه سَپَر لَعل و گُهَر

سؤز دانیشماقدا سنی حقّ نه توانا یارادوب

آهویِ دشتِ خَتـا باخماقی سَندَن دیلَنَر

گؤزون آهو گؤزونه اؤخشادان اِیلوبدی ضَرَر

اؤ گؤزل گؤزلَـرووَه باخسا اگر اهل نَظَر

ییخیلوب تپراقا خلق اِیلیَنه سجده ائدَر

دِئیَر:الله اؤ گؤزی نرگسِ شَهلا یارادوب

تیغِ خَم قاشلارووا کیم دِئسه اِی ماه لقا

دوزدی تشبیه چکور لیکن اِئدور عُمده خَطا

تیغ قلبی یـارالار قـاشلارون ایلَرلَـه دوا

زَخمه مَرهَمدی اؤ قاشلار بالا ویرمازلا یارا

قاشووی حَقّ اَلی محرابِ مُصَلّیا یارادوب

ناز اِئدَر تاجه باشوندا یاشیل عَمّامَه سَنون

لبووَه غبطه اِئدر اؤغـلـوم عَقیقی یَمَنون

یاناقون شَرمَه سالار لالَه سین هَر بیر چَمَنون

صورتون آی گؤرونَر گؤزلرینه هَر گؤرَنون

زلفون آی دورَه سینه بیر شب یلدا یارادوب

قـارادور طُـرّه ی زلفون شبِ یلدا مَثَلی

خِلقَتوندَه فَتَبارَکْ بـویـوروب ربِّ جَلی

خَلق ائدر قامتون اَلحَق که قیامتلر عَلی

نـه گؤزل خلق ائلیوبدور سنی حَیِّ اَزَلی

زلفوووُن طُرَّه سین اِیلوبدی چَلیپا یارادوب

مین سپاس اؤلسون اؤغول خالق اِعجازگَرَه

زلفووی شام ائلیوب ؛ صورتون اوخشار سَحَرَه

گَر یوزونده اولان اعضانی گَتورسَم نَظَرَه

نظمیلن سانکی دوزوب آیَه لَری سورَه لَرَه

دست قُدرتله سَنی خالقِ یکتا یارادوب

حیف اؤلا آیری سالور دستِ قضا مَنله سَنی

سن شهید اولمالیسان ؛ ایلیَر آواره منی

لیلینون جنگه گئدور یوسف گل پیرهنی

سالاجاق حیرته حُسنون سَنون هر بیر گؤرَنی

گؤرَه جَکلرکه قَدون محشرصغریا یارادوب

نیلَرَم گَلمَسون اؤغلوم بو سفردن سن اگر

نیلَرَم اَل اَله گَر وئرسَه قَـضـائیلـه قَدَر

آلسا مندن سنی قالسام اَلی قوینوندا مَلَر

نیلَرَم سن دئ صورا ایله بو میدانه سفر

چون سؤزون دائمی قلبیمده تسلّیا یارادوب

بختور اولموشودوم من اِئل آرا سَنلَن اؤغول

بو جهان اولموشودی سنله منه گلشَن اؤغول

بوچتین لحظه اوزوم اَل نجه سَندَن مَن اؤغول

قیل دعا صَبر وِئره ذات حَق ذوالمَن اؤغول

اورَگیمده گئدیشون شورش و غوغا یارادوب

سالورام جنگه سنی تشنه دوداقیلـه یولا

تشنه جنگ اِیلَمَگونده باش اوجالداندی بالا

ایکی دنیاده بـاشون لطف حقیلن اوجالا

گرچه ایستور بو فلک آرزولاریم دلده قالا

ولی خـالق آنووی درده شکیبا یارادوب

دؤزَرَم ایندی که تقدیر بئله ایستور اولا

باشیـمـا اؤز اَلیمیلن سالارام منده قـارا

سنی وئرمیشدی امانت مَنَه حق ایستور آلا

عاشقِ شهدِ شهادت سنی اِیلوبدی خُـدا

شُکر لِـلـَّه منیده صَبریده دَریا یارادوب

گئت یوبانما که گؤزتلور سنی میداندا عَدو

یاور اولسون بو چتین لحظه سنه حضرت هو

باخیشون فاش ائدر الآن منه چوخ راز مگو

نیلیوم خیمه ده یؤخدور بالا بیر قطره ده سو

آنوون روحینه بـو مسئلـه ایذا یارادوب

آنا؛گئتسه سفره اوغلی؛ دالیجان سو سَپَر

سپَرَم گؤز یاشیمی من یولا نیلک بو سفر

دور دؤیوم گؤزله اِئدوم قامتوه ایندی نظر

گؤرمَرَم بیرده مَن اؤل قامت زیبانی پسر

اَلحَق اؤل قامتی حَق سروِ دل آرا یارادوب

سوز دانیش قؤی ائشیده لیلی نالان سوزوی

اؤ گوزل قاش گؤزون ایلوب بالا زیبا یوزوی

دؤزَرَم فرقتووَه سن هئچ ایتیرمه اوزوی

آخرین دفعه آنون قوی اُؤپه زیبا گؤزوی

اؤل گؤزی که منه بیر عُمرتمنّا یارادوب

گئتدی میدانه غرض اکبرفرزانه خصال

کامه چاتدی او جوان نوش ایلدی شهدِ وصال

آناسی لیلی اؤلوب غم زده و غرقِ ملال

چوخ دِئیَردی علی اِی گوهرِ دریایِ کمال

فُرقَتون لیلیه گَل گؤر نـه بلایا یارادوب

آغلارام هر گئجه گوندوز دِئیَرَم وای بالا وای

سنی وئرموشدی منه قدرت اَلی پای بالا وای

حسنووَه چشم فلک گورمیه جَک تای بالا وای

گلوب اِی کاش وئریدون حالیما سای بالا وای

مُفتی عشق گؤریدون که نه فتوا یارادوب!

((جعفری))گر سنه لطف اِیلیَه اکبر نَه غَمون

لطفی بَسدور سَنه یؤخدور ایکی دنیادَه کَمون

گئت سیخیل سایه سینه پرچم و طشت و عَلَمون

آغلا سَن اکبره تـا آغلادان اولسون قَلَمون

گؤرَه لر اوندا قلم شعری نه شیوا یارادوب

التماس دعا ؛ جعفری