نور ایمان

شَرَّه حکم ایلر بَشَر گر اؤنـدا وجدان اؤلماسا

حقّی نـاحقّ اِیلییَر قـلـبـیـنـده ایمان اؤلماسا

ظُـلـمدَن اِیـلـر حمایت ظالمی چـؤخ ایستیر

دوز یؤلی سیر اِیلَمَز گر لطفِ یَـزدان اؤلماسا

گوندوزی گوندوز اِئدَن؛گوندور؛مُسَلّم سوزدی بو

گوندوز اولماز ؛ بَلّیدور گر مِهرِ تابان اؤلماسا

نور ایمان اولماسا قلبینده گر بیر کیمسه نون

بَـرده ی ابلیس اؤلار ؛ گر عین شیطان اؤلماسا

حق سوزه وئرمز قولاق هرکیمسه اهلِ فِسقدور

قلب اؤلار تـیـره ایچینده نور سبحان اؤلماسا

مُنکَره اَمر اِیلـیـوب ؛ معروف دَن  نهی اِیلییَر

هَـر او کس کـه تابع منطقله ؛ بُرهان اؤلماسا

شُبهه لی لُقمه اِئـدر انسانی دوز یؤلدان اوزاق

دوز اؤلار گَر سفره سینده شُبهه لی نان اؤلماسا

دیـو و دَد مِـثـلـی درنده خو اولار انسان بَلی

رهـنـمـایِ راهـی گَـر خـلّاقِ مَـنّـان اؤلماسا

شاکر اول خلاّقه شُکر ائت وئردیگی نعمتلَرَه

نعمت آرتار گون بَگون؛گر سندَه کُفران اؤلماسا

کفر چَنگوندَن چیخاردار نعمتی((سعدی))دیوب

دؤز سوزی ایلَر قبول هرکس که نادان اؤلماسا

خیر و شر قارداشدیلار ؛ بـاهـم گَزوللَّر دائماً

شرّی بوشلا؛خیری دوت گر سَندَه نُقصان اؤلماسا

اِئت کُمک حَقَّه؛حقیقتگو اولوب؛حَق سوز دانیش

یـا سکوت اِیـلـه ؛ بیـانِ حقَّه اِمکان اؤلماسا

لال قالماق یاخشیدور ناحق دانیشماقدان؛بَلی

خوش سعادتدور اؤ کس که اهلِ بُهتان اؤلماسا

غیبت ائتمَز ، غیبته وئرمَز قـولاق عـاقـل بشر

اِیلَه مَز شیطانه یــاری اهـلِ خُسران اؤلماسا

عـهـد و پـیـمـان اِیلَسون ؛ اِیلَه وفا اِجراسینه

داش؛داش اوسته بند اولانماز؛عهد و پیمان اؤلماسا

اول یاغیش مثلیندَه یاغ هم داغلارا هم باغلارا

داغ دوشونده گُل گوگَرمَز لطفِ باران اؤلماسا

دوت اَیاقدان دوشموش اِنسانلار اَلیندَن قارداشیم

سَن کیمی انساندی؛حتی گَر مُسَلمان اؤلماسا

مؤمن و مسلم؛صحابه گئتدیگی یؤلدان گئدَر

اوخشیار مِـقـداده گَر بوذرله سَلمان اؤلماسا

((جعفری))سالم آدام دوز یؤل گئدَندَه آخساماز

بـاشمـاقی ایچره اگر ریگِ بـیـابـان اؤلماسا