قؤشما - دهقان نورانی ناطور
سایین دهقان جنابلاریندان بیر تورکی قؤشما
قؤشما ( شعر 11 هجای تورکی)
من بیر گولَم شـورانلیقدا بیتمیشم
آخـتـاریـرام تـاپـانـمورام اِئلیمی
آلـچـاق ؛ قؤیما اوجالارا سن قدم
ایـاقـلـیـوب اَزمَـه منـیـم بئلیمی
یـارالـی اورکـلَـر یـاراسینـدایام
ظولمَت گئجَـه لَرین قاراسیندایام
تیکانلی کـؤل لاریـن آراسیندایام
قـاچـانمـورام فلک دوتوب اَلیمی
ایـاقـلـیـوب اَزمَـه منـیـم بئلیمی
گئجه می گوندوزه قاتیبدی زامان
وطـنـدَن اوزاقــا آتیـبـدی زامان
آغلادیب قول کیمین ساتیبدی زامان
گؤرَن یؤخدی گؤزدَن آخان سئلیمی
ایـاقـلـیـوب اَزمَـه منـیـم بئلیمی
من وورغونـام اؤز ائلیمَـه یوردوما
دَدَه قـورقود بئجَرتدیگی قوردوما
کیمسَم یوخدی دوشَه منیم آردیما
تک قالمیشام غم آغاردیب تئلیمی
ایـاقـلـیـوب اَزمَـه منـیـم بئلیمی
وطن عطرین یئل گَتیرمیر بویـانـا
غُربت ائلـدَه یـاتـانلاریم اؤیـانـا
ظالیملَریـن قـارشیسینـدا دایـانـا
بؤغولورام قؤیون اَس سین یئلیمی
ایـاقـلـیـوب اَزمَـه منـیـم بئلیمی
آنـا یـوردوم آذربایجان یاشاسین
دامارلاردا دؤلانـان قـان یاشاسین
وطن دُعا اِئت سَن((دهقان))یاشاسین
یـاشـادارام عـؤمـور بویی دیلیمی
ایـاقـلـیـوب اَزمَـه منـیـم بئلیمی
تهران ؛ دوشنبه 23/10/1392 ؛ دهقان نورانی ناطور
سلام بر شما که به این وبلاگ سر می زنید. ممنون لطف تان هستم.