اشعار ترکی و فارسی از دو شاعر خلخال

سایین دهقان نورانی جنابلاریندان

اوشاق مثلی اورگیمی آچیب ؛ بَلَرَم

شعرین قالیبی : غزل (ابیاتین سایی : 10 بیت)

بند اؤلوب زولفووَه کؤنلوم هارا گِئتسون گَلَرَم

گؤز یاشین قانه قاتیب ؛ عشقیله گؤزدَن اَلَرَم

منـده فـرهـاد کیمین آغزیمی شیرین اِئلییَم

شیرینی یاده سالیب ؛ داغلاری هر گون دَلَرَم

عشقون آلدیقجا منیم عقلیمی باشدان گؤزلیم

دوشَرَم چؤللَرَه هَرگون ؛ گئجه گوندوز مَلَرَم

سایارام عشقوویلَن گؤیدَه کی اولدوزلاری من

یاتمارام صُبحَه کیمین کؤنلومی من غُصَّه لَرَم

وادی عشقه دوشوب دردیلَه پـیـکـار اِئدورَم

آیـریلیـق لشگرینـه حملـه اِئدوب حَربَه لَرَم

غم و غُصّیلَه بَلَنمیش اورگین قـونـداقـیـنـی

بیر اوشاق مثلی آچیب دردیلَـه هر گون بَلَرَم

غـم ؛ کَـدَر دالـغـالانیر ؛ قلبیمین آرامین آلیر

ساحل وصلـووَه چـاتـسـام بیلـیـرَم دینجَلَرَم

سَنَه عـاشق اؤلالـی ؛ دیلدَه دؤلانمیر دانیشام

یـازارام دفـتـره آدون ؛ اؤخـیـام هُـجَّـه لَرَم

هجرانین داشین آتیب گؤرسَم اگر گُل یوزووی

اؤ گؤزل قاش؛گؤزووَه وَسمَه چکیب؛ سورمَه لَرَم

((دهقانـام))مین یؤل اگر سینَمی یارسؤن نه غمیم

آی یوزون گورمگیچون هاردا سَن اؤلسون گَلَرَم

تهران ؛ تهرانپارس ؛ دوشنبه 25/9/1392 ؛ دهقان نورانی