نئجَه سَن ؟ - دهقان نورانی
سایین دهقان نورانی جنابلاریندان تورکی غزل
نئجَه سَن ؟
هارداسان اِی گؤزلیم جان سنه قوربان نئجه سن؟
جسمیمه روح رَوان ؛ کؤنلومَه سلطان نئجه سن؟
یـانیرام هجر اؤدونـا ؛ آمما وصال آختاریرام
سالموسان دَرده منی دردیمه درمان نئجه سن؟
رُخ عـیـان اِیـلَـه یانیم آتشِ عشقوندَه سنون
نور محفل لَر اؤلان ؛ شمعِ شبستان نئجه سن؟
سن کیمین گول گَـزورَم بـلـبـلِ شیدا مَثَلی
عطرینی حَقدن آلان؛اِی گُلِ ریحان نئجه سن؟
حُسنِ رخساروویلَن عـالَـمـی مست اِیلَموسَن
اوجا بؤی؛قاشی کَمان؛سَروِ خرامان نئجه سن؟
آی اوزوندَن اوتـانـار ؛ گون سَنیلَن فخر اِئلییَر
عالمَه نور ساچان ؛ جلوه ی جانان نئجه سن؟
نورسَن ؛ نوروویلَن عـالَـمـی سیراب ائدوسَن
معدنِ فضل و کَرَم ؛ خسروِ خوبان نئجه سن؟
یؤخدی بیرکس اورَگین دَردینی اِظهار اِئلییَم
هادیِ خَـلـقِ جهان ؛ ناجی انسان نئجه سن؟
هاردا((دهقان))گؤرَجَک سَن کیمی دُنیا گؤزَلین
نـایـبِ شیرِ خُـدا ؛ نـاطقِ قُـرآن نئجه سن؟
تهران ؛ شنبه 5/11/1392 ؛ دهقان نورانی
سلام بر شما که به این وبلاگ سر می زنید. ممنون لطف تان هستم.