اشعار ترکی و فارسی از دو شاعر خلخال

یـاردان گِـلَـه

شعرین قالیبی : غزل(ابیاتین سایی : 14 بیت)

مرحمت یـؤخـدور مَـنَـه یـارِ نکو رُخساردَن

روزگـاریـمـدَن گِـلایَـه اِیلیـوم؟ یا یاردَن؟

عاشق اِئتدی؛آتدی گئتدی؛قؤیدی تک اؤز عاشقین

چؤخ ائشیتدیم طَعنه لر عِشقینده من اَغیاردَن

بختیمین آخساقلیقین چؤخدان اؤزومده بیلمیشم

من قاپیمدان قؤومادان؛ غمدور گلیر دیواردَن

ای فَلَک باتسین نظام گَردشون ؛ سَن نیلوسَن

گول دَرَن حاشا قـالا ایـمـن جـفـای خاردن

اؤخشـورام زندیـقـه عشق یـاردور علَّت اؤنا

هم بِئلیم ؛ هم بؤینوم اینجیر آسدیقیم زُنّاردَن

چؤخ دیوللَّر چیخ چمنده سیر اِئلَه؛گلشندَه گَز

کؤنلوم امّـا لـذّت آلـمـور گلشن و گلزاردَن

اِی طَبیعت؛اِی فَلک؛اِی چَرخ بَسدور رَحم اِئدون

سیز نه ایستیرسوز مگر بو خسته و بیماردَن؟

ظُلم ائدوبسوز تک منه یؤخ؛جمله ی عاشقلره

شرح وئرسم ظلموزی ؛ ایشلر چیخار معیاردَن

هانسی عاشق وَصله چاتمیش؟سیز دِیون من اؤرگنیم

عشق باعث اؤلدی حـلّاج آسلانوبدور داردَن

یالواریم آللاهَه شاید رَحمَه گلدی سئوگیلیم

بلکه قـورتاردیم بـو عُمر تلخ و محنت باردَن

سئوگیلیم ناز اِیلَمَه ؛ نازون منی جاندان سالیر

ایستیسَن نه ؟ منده کی بو جان بی مقداردَن

سن زلیخا؛منده یوسف اؤلماروق واضحدی بو

آلمیوبسان قول کیمین سَن که منی بازاردَن!

گَل دانیش منلَن بو سینمیش کؤنلومی شاد اِئتگیلن

بـو ایشـه پـاداش آلارسان خـالـق داداردَن

((جعفری)) گَـر اؤلماسایدی لُطفِ یـار ِگُلعذار

خَـلـق ائدَنمزدی قَـلَـم بیر سَطر بو اشعاردَن

تهران ؛ پنجشنبه 17/11/1392 ؛ جعفری زاویه